លោកស្រី រស់ យ៉ាណា

ប្រធាន នៃសាលារៀន អន្តរទ្វីប អាមេរិកាំង

ជម្រាបសួរលោក លោកស្រី និងប្អូនៗកុមារជាទីគោរព ស្រឡាញ់រាប់អាន!
នាងខ្ញុំសូមអរគុណយ៉ាងជ្រាលជ្រៅចំពោះការគាំទ្រ និងជឿ​ជាក់​លើ​សាលា​រៀន អន្តរទ្វីប អាមេរិកាំង!

សាលារៀន អន្តរទ្វីប អាមេរិកាំង គឺជា​សាលា​រៀន​ចំណេះដឹង​ទូទៅ​ខ្មែរ​ដែល​មាន​កម្រិត​គុណភាព​អប់រំខ្ពស់ វិន័យល្អ និង​សេវាកម្ម​រហ័ស​ប្រកប​ដោយ​ភាព​កក់ក្តៅ។ បរិយាកាស​សិក្សា​ប្រកប​​ដោយ​ផាសុកភាព ថ្នាក់​រៀន​មាន​ភាព​ទាក់ទាញ​គួរ​ឱ្យ​ចង់រៀន សម្ភារ​ឧបទេស​ក្នុង​​ការ​បង្រៀន​សម្បូរបែប លោកគ្រូ អ្នកគ្រូ ប្រកប​ដោយ​ជំនាញ​វិជា្ជជីវៈ​ពិតប្រាកដ។

សម្រាប់​កុមា​រតូចៗ​ ប្អូន​ៗនឹង​ទទួល​បាន​នូវ​ចំណេះដឹង​ មូលដ្ឋាន​គ្រឹះ​បំណិន​ស្តី​ពី​ការ​ងាយ​សម្រប​ខ្លួន​ក្នុង​ការសិក្សា​ តាំងពី​ថ្ងៃ​ដំបូង​នៃ​ការ​ចាប់ផ្តើម​សិក្សា​ ការប្រតិបត្តិ​ខ្លួន​ចំពោះ​ជីវភាពរស់នៅ​ប្រចាំថ្ងៃ​ និង​ការ​ប្រាស្រ័យ​ជាមួយ​មនុស្ស​ជុំវិញ​ប្រកបដោយ​សីលធម៌​ និង​សុជីវធម៌​ល្អ​។ សម្រាប់​ប្អូន​ៗកុមារ​កម្រិត​បឋមសិក្សា​ ដែល​បាន​សិក្សា​នៅ​សាលារៀន​ អន្តរទ្វីប​ អាមេរិកាំង​ មិន​ត្រឹមតែ​ទទួល​បាន​នូវ​ចំណេះដឹង​ទូទៅ​ខ្មែរ​ប៉ុណ្ណោះទេ​ ប្អូន​ៗថែមទាំង​ទទួល​បាន​នូវ​ការ​បង្ហាត់បង្រៀន​បន្ថែម​នូវ​មុខវិជ្ជា​មួយចំនួន​ដូចជា​ ភាសាអង់គ្លេស​ កុំព្យូទ័រ​ សិល្បៈ​ភ្លេង​ សិល្បៈ​របាំ​ សិល្បៈគំនូរ​ គេហកិច្ច​ និងកីឡា​ជាច្រើន​ប្រភេទ​ ព្រមទាំង​បណ្តុះ​នូវ​បំណិន​ប្រសប់​ក្នុង​ការសម្រប​ខ្លួន​យ៉ាង​ប្រសើរ​សម្រាប់​ជីវភាពរស់នៅ​ប្រចាំថ្ងៃ។

ប្អូនៗ​កុមារ​ទាំងអស់​មាន​ឱកាស​បញ្ចេញ​នូវ​ទេព​កោសល្យ​សម្តែង​បង្ហាញ​ពី​ភាព​ច្នៃ​ប្រឌិត បំណិន​ប្រសប់​របស់​ខ្លួន​ក៏​ដូច​ជា​ការ​បញ្ចេញ​ចំណេះ​ដឹង​ទៅ​ចូល​រួម​ប្រកួត​ប្រជែង​ក្នុង​កម្មវិធី​ផ្សេងៗ ទាំង​កម្មវិធី​ក្នុង​សាលារៀន ក៏ដូចជា​ចូល​រួម​ជាមួយ​ស្ថាប័នផ្សេងៗ​ទៀត ពិសេស​ស្ថាប័នរដ្ឋ។ សិក្សា​នៅ​សាលារៀន អន្តរទ្វីប អាមេរិកាំង គឺ​ពិត​ជា​បាន​ទទួល​ការ​បណ្តុះ​នូវ​ចតុស្តម្ភ​ទាំងបួន​ពិត​ប្រាកដ គឺចំណេះដឹង ចំណេះធ្វើ សីលធម៌ល្អ និង​ចេះរួម​រស់​ជា​មួយគ្នា​ប្រកប​ដោយ​ភាព​សុខដុមរមនា។ កត្តាទាំងនេះ ជា​ឱកាស​ដែល​អាច​រុញ​ច្រាន​ប្អូនៗ​កុមារ​ឱ្យ​ទទួល​បាន​ភាព​ជោគ​ជ័យ​ក្នុង​វ័យ​សិក្សា​របស់ពួកគេ ហើយ​ក៏​ជា​ឱកាស​ដែលពួកគេ នឹង​ទទួល​បាន​នូវ​អនាគត​ដ៏​ភ្លឺ​ត្រចះ​ត្រចង់។

ក្នុងនាមយើងខ្ញុំជាតំណាងបុគ្គលិកសិក្សាទាំងអស់នៃសាលារៀន អន្តរទ្វីប អាមេរិកាំង សូម​ថ្លែង​អំណរ​គុណ​យ៉ាង​ជ្រាល​ជ្រៅ​ចំពោះ​លោក លោកស្រី មាតាបិតា អ្នក​អាណាព្យាបាល និងប្អូនៗ​កុមារ​ទាំង​អស់​ដែល​តែងតែ​គាំទ្រ និង​មាន​ទំនុក​ចិត្ត​ចំពោះ​សាលា​យើងខ្ញុំ។ តាង​នាម​ឱ្យ​បុគ្គលិក​សិក្សា​​ទាំង​អស់ សូម​គោរព​ជូន​ពរលោក លោកស្រី មាតាបិតា អ្នកអាណាព្យាបាល និង​ប្អូនៗ​កុមារ​ទាំង​អស់​ជួប​តែ​ពុទ្ធពរ​ទាំង​បួន​ប្រការ គឺ អាយុ វណ្ណៈ សុខៈ និងពលៈ​កុំ​បី​ឃ្លៀង​ឃ្លាត​ឡើយ។

លោក ជា សម្បត្តិ

នាយកចាងហ្វាង សាខាទួលគោក

លោក​ ជា​ សម្បត្តិ​ កើត​នៅក្នុង​ឆ្នាំ១៩៨២​ នៅ​រាជធានី​ភ្នំពេញ​។ លោក​ទទួល​បាន​សញ្ញាបត្រ​កម្រិត​បរិញ្ញាបត្រ​ ផ្នែក​ប្រវត្តិ​សាស្រ្ត​ នៃ​សាកល​វិទ្យាល័យ​ភូមិន្ទ​ភ្នំពេញ​ នៅក្នុង​ឆ្នាំ២០០៥​។ នៅ​ឆ្នាំ២០០៦​ បាន​ចេញទៅ​បម្រើការ​ងារ​ជា​គ្រូបង្រៀន​ នៅ​វិទ្យាល័យ​ព្រះរាជ​សម្ភារ​ ខេត្តកំពត​ បាន​រយៈពេល៣ឆ្នាំ​។ ក្រោយមក​បាន​ផ្ទេរ​ការងារ​ពី​ខេត្តកំពត​ មក​បម្រើ​កា​ងារ​នៅ​វិទ្យាល័យ​ ហ៊ុន​ សែន​ កំពង់កន្ទួត​ ខេត្តកណ្តាល​។ លោក​ បាន​ចូល​បម្រើការ​ងារ​នៅ​សាលារៀន​ អន្ដរ​ទ្វីប​ អាមេរិកាំង​ នៅ​ថ្ងៃទី១៤​ ខែកញ្ញា​ ឆ្នាំ២០០៩​ ក្នុង​តួនាទី​ជា​គ្រូបង្រៀន​ប្រវត្តិវិទ្យា​ ផ្នែក​មធ្យមសិក្សា​ទុតិយភូមិ​ និង​ជា​គ្រូ​បន្ទុក​ថ្នាក់​ (ពេញ​ម៉ោង​)។

ដោយ​យោង​ទៅលើ​សមត្ថភាព​ការងារ​ ការ​ខិតខំ​ប្រឹងប្រែង​ និង​ភាព​តស៊ូ​ អត់ធ្មត់​ក្នុង​ការ​បំពេញការងារ​ក្នុងរយៈពេល០៦ឆ្នាំ​ ដែល​លោក​បាន​បម្រើការ​ងារ​ជូន​សាលារៀន​ អន្ដរ​ទ្វីប​ អាមេរិកាំង​ លោក​ទទួល​បានការ​តំឡើង​តួនាទី​ជា​បន្ដ​បន្ទាប់​ចំនួន៣ដង​។ នៅ​ខែកញ្ញា​ ឆ្នាំ២០១១​ លោក​ត្រូវ​បាន​តំឡើង​តួនាទី​ពី​គ្រូបង្រៀន​ពេញ​ម៉ោង​ ទៅជា​មន្រ្តី​រដ្ឋបាល​កម្រិតមធ្យម​សិក្សា​ទុតិយភូមិ​។ បន្ទាប់មក​នៅ​ថ្ងៃទី១៩​ ខែសីហា​ ឆ្នាំ២០១៣​ លោក​ត្រូវ​បាន​តំឡើង​តួនាទី​ទៅជា​ចាងហ្វាង​រង​មធ្យមសិក្សា​ទុតិយភូមិ​ នៃ​សាលារៀន​ អន្ដរ​ទ្វីប​ អាមេរិកាំង​ សាខា​ម៉ៅសេទុង​ (ការិយាល័យ​កណ្តាល​) ហើយ​ក្រោយមក​ទៀត​លោក​ត្រូវ​បាន​តំឡើង​តួនាទី​ទៅជា​នាយក​ចាងហ្វាង​ និង​ចាងហ្វាង​មធ្យមសិក្សា​ទុតិយភូមិ​ នៅ​ថ្ងៃទី១៨​ ខែវិច្ឆិកា​ ឆ្នាំ២០១៥​។

លោក​ បាន​ពេញការ​ងារ​យ៉ាង​ល្អ​ប្រសើរ​ជូន​ស្ថាប័ន​អស់​រយៈពេល០៦ឆ្នាំ​កន្លងមក​នេះ​។ លោក​ គឺជា​ថ្នាក់ដឹកនាំ​មួយ​រូប​ដែល​មានការ​ប្តេជ្ញា​ចិត្ត​ខ្ពស់​ពោរពេញ​ដោយ​គំនិត​ច្នៃប្រឌិត​ ប្រកបដោយ​ក្រម​សី​លធម៌​វិជ្ជាជីវៈ​ខ្ពស់​ក្នុង​ការ​បំពេញការងារ​។ សាលារៀន​ បាន​កោតសរសើរ​យ៉ាង​ស្មោះចំពោះ​លោក​ ដែល​មានការ​លះបង់​ខ្ពស់​ និង​ខិតខំ​អស់ពី​កម្លាំងកាយ​ចិត្ត​បំពេញការងារ​ ព្រមទាំង​បាន​រួមចំណែក​ក្នុង​ការ​អភិវឌ្ឍ​ស្ថាប័ន​ឱ្យ​ទទួល​បាន​ជោគជ័យ​រហូតមកដល់​បច្ចុប្បន្ន​នេះ។

លោក ហ៊ុល សារួន

ចាងហ្វាងមធ្យមសិក្សាបឋមភូមិ សាខាទួលគោក

ខ្ញុំបាទ ហ៊ុល សារួន អតីតជាអ្នកអប់រំ សម្របសម្រួលកម្មវិធីបណ្តុះបណ្តាលវិជ្ជាជីវៈ និងជាអ្នកមកប្រែ ភាសាបារាំង អង់គ្លេស ខ្មែរ នៅអង្គការក្រៅរដ្ឋាភិបាលមួយ (អង្គការដើម្បីភាពញញឹមនៃកុមារ PSE)។

ការធ្វើការក្នុងរយៈពេលយូរនៅស្ថាប័ន្ថមួយ (រយៈពេល១១ឆ្នាំ) បានធ្វើអោយខ្ញុំមានគំនិតចង់ផ្លាស់ប្តូរទីកន្លែងការងារថ្មី ដើម្បីធ្វើការផ្លាស់ប្តូរបទពិសោធន៍ ទទួលនូវអ្វីដែលថ្មី និងដើម្បីបញ្ចេញសមត្ថភាពដែលខ្លួនមាន។ តាមរយៈការសិក្សា បទពិសោធន៍ ការស្រលាញ់ និងដោយសារការគិតថាការបម្រើការងារលើផ្នែក វិស័យអប់រំមានតម្លៃជាងគេ ខ្ញុំបានមើលឃើញនូវសាលាឯកជនមួយដែលខ្ញុំមានបំណងចង់បម្រើការងារ គឺសាលាអន្តរទ្វីបអាមេរិកាំង ដែលជាសាលាធ្វើការបណ្តុះបណ្តាល និងអប់រំដោយផ្តោតលើវិន័យ គុណភាព និង សេវាកម្មជាចម្បង។

ហើយអ្វីដែលជាតម្លៃរបស់សាលាមួយទៀត គឺការបង្រៀនដល់សិស្សអោយមាន ភាពស្មោះត្រង់ មានការទទួលខុសត្រូវខ្ពស់ និងការស្ងប់នូវអំពើពុករលួយ។ ហើយរាល់ជោគជ័យនៃការសិក្សារបស់សិស្ស គឺជាលទ្ធផលដែលចេញពីសមត្ថភាពនៃការខំប្រឹងប្រែងយ៉ាងពិតប្រាកដរបស់ពួកគេដោយផ្ទាល់ ។ ម្យ៉ាងទៀត តាមរយៈកម្មវិធីរបស់សាលា សិស្សបានចូលរួមក្នុងសកម្មភាពសង្គមជាច្រើន ទាំងសកម្មភាពស្រាវជ្រាវ មនុស្សធម៌ វប្បធម៌ សកម្មភាពបំណិន និងសកម្មភាពកំសាន្ត។

ជាការពិតនៅក្នុងប្រទេសមួយ ភាពរីកចម្រើន និងការអភិវឌ្ឍរបស់ជាតិ គឺអាស្រ័យទៅលើគុណភាពនៃការអប់រំរបស់ប្រទេសនោះ ព្រោះវិស័យមួយនេះបានដើរតួនាទីយ៉ាងសំខាន់ ហើយជាវិស័យសេនាធិការក្នុងការបញ្ចេញធនធានមនុស្សដើម្បីបម្រើប្រទេសអោយមានវឌ្ឍនភាព។ មួយវិញទៀត បើក្នុងប្រទេសមួយដែលសម្បូរដោយមនុស្សចេះដឹងមានន័យថាគុណភាពអប់រំល្អ ប្រទេសនោះនឹងពោរពេញទៅដោយធនធានមនុស្សដែលធ្វើការប្រកបដោយសក្តានុពល ប្រកបដោយគុណធម៌ សីលធម៌ និងមានការអភិវឌ្ឍន៍យ៉ាងឆាប់រហ័ស ដូចពាក្យស្លោកមួយបញ្ជាក់បានថា គុណភាពនៃការអប់រំជាគុណភាពនៃការអភិឌ្ឍន៍ជាតិ និងគ្រួសារ។

លោកស្រី អ៊ាវ ណារី

ចាងហ្វាងក្រោមមត្តេយ្យ មត្តេយ្យ និងបឋមសិក្សា សាខាទួលគោក

លោកស្រី អ៊ាវ ណារី កើតនៅឆ្នាំ១៩៧៥ នៅខេត្តកំពត។ លោកស្រីទទួលបានសញ្ញាបត្រមធ្យមសិក្សា ទុតិយភូមិនៅឆ្នាំ១៩៩២ រួចបន្តការសិក្សានៅសាលាគរុសកោសល្យ និងវិក្រិតការខេត្តកំពត នៅឆ្នាំ១៩៩៤ និងបញ្ចប់នៅឆ្នាំ១៩៩៦។ នៅថ្ងៃទី០១ ខែតុលា ឆ្នាំ១៩៩៦ លោកស្រីបានចូលបម្រើការងារក្នុងស្ថាប័នរដ្ឋ នៃសាលាបឋមសិក្សា លក ដែលស្ថិតនៅស្រុកកំពង់ត្រាច ខេត្តកំពត។ បន្ទាប់មកនៅថ្ងៃទី០១ ខែតុលា ឆ្នាំ២០០១ លោកស្រីក៏បានផ្លាស់ប្តូរការងារមកបម្រើការងារនៅអង្គការដើម្បីភាពញញឹមនៃកុមារ ក្នុងតួនាទីជាគ្រូបង្រៀន។ ផ្អែកលើសមត្ថភាពការងាររបស់លោកស្រី លោកស្រីត្រូវបានដំឡើងតួនាទីជាជំនួយការគរុកោសល្យ ផ្នែកបឋមសិក្សា។ លោកស្រីបានចាប់ផ្តើមបម្រើការងារនៅសាលារៀន អន្តរទ្វីប អាមេរិកាំង នៅថ្ងៃទី១៣ ខែកក្កដា ឆ្នាំ២០១៥ ក្នុងតួនាទីជាចាងហ្វាងរងក្រោមមត្តេយ្យ មត្តេយ្យ និងបឋមសិក្សារហូតមកដល់សព្វថ្ងៃនេះ។

ក្នុងនាមយើងខ្ញុំជាតំណាងបុគ្គលិកសិក្សាទាំងអស់នៃសាលារៀន អន្តរទ្វីប អាមេរិកាំង សូមថ្លែងអំណរគុណ យ៉ាងជ្រាលជ្រៅចំពោះលោក លោកស្រី មាតាបិតា អ្នកអាណាព្យាបាល និងប្អូនៗកុមារទាំងអស់ដែលតែងតែគាំទ្រ និងមានទំនុកចិត្តចំពោះសាលាយើងខ្ញុំ។ តាំងនាមឱ្យបុគ្គលិកសិក្សាទាំងអស់ សូមគោរពជូនពរលោក លោកស្រី មាតាបិតា អ្នកអាណាព្យាបាល និងប្អូនៗកុមារទាំងអស់ជួបតែពុទ្ធពរទាំងបួនប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។

លោក អុី ប៊ុនលី

ចាងហ្វាងរងមធ្យមសិក្សាទុតិយភូមិ សាខាទួលគោក

លោកបានបញ្ចប់ថ្នាក់បរិញ្ញាបត្រជំនាញប្រវត្តិវិទ្យា ពីសាកលវិទ្យាល័យភូមិន្ទភ្នំពេញ នៅក្នុងឆ្នាំ​ ​២០០៣ ហើយបានបន្តចាប់យកជំនាញជាគ្រូបង្រៀនដោយឆ្លងកាត់ការបណ្តុះបណ្តាលគ្រូបង្រៀន​កម្រិតឧត្តមពីវិទ្យាស្ថានជាតិអប់រំ (NIE) នៅក្នុងឆ្នាំ២០០៥។ បន្ទាប់មកទៀត លោកបាន​បញ្ចប់​ដោយ​ជោគជ័យថ្នាក់បរិញ្ញាបត្រជាន់ខ្ពស់ ឯកទេសប្រវត្តិវិទ្យា ពីរាជបណ្ឌិត្យសភាកម្ពុជា​នៅក្នុងឆ្នាំ​២០០៨។ ជាការពិតណាស់ ការបោះជំហានចូលក្នុងវិថីអប់រំចំណេះដឹងទូទៅ គឺចាប់ផ្តើមពីគ្រូបង្រៀនពេញម៉ោង លើមុខវិជ្ជាប្រវត្តិវិទ្យា និងភូមិវិទ្យានៅសាលារៀន អន្តរទ្វីប អាមេរិកាំង ចាប់តាំងពីសាលានេះចាប់​បដិសន្ធិឡើងនៅឆ្នាំ២០០៥។ លោកបានផ្លាស់ប្តូរតួនាទីជាបន្តបន្ទាប់ក្នុងអំឡុងរយៈពេល១៥ឆ្នាំនេះ ពេលខ្លះជាគ្រូក្រៅម៉ោង ពាក់កណ្តាលពេញម៉ោង គ្រូពេញម៉ោង ថែមទាំងមានតួនាទីជា​អនុប្រធាន​ក្រុម និងប្រធានក្រុមបច្ចេកទេសមុខវិជ្ជាទៀតផង។       ឆ្លងកាត់បទពិសោធន៍បង្រៀន និងដឹកនាំក្រុមមុខវិជ្ជា អស់រយៈពេលជិត១៥ឆ្នាំ លោកត្រូវបាន​គណៈ​គ្រប់គ្រង​សាលាប្រគល់តួនាទីថ្មីមួយទៀតជាចាងហ្វាងរងមធ្យមសិក្សាទុតិយភូមិចាប់ពីថ្ងៃទី០១ ខែ​មីនា ឆ្នាំ២០២០។ ជាមួយនឹងតួនាទី និងទំនួលខុសត្រូវកាន់តែធំជាងមុន ពិតជាផ្តល់អត្ថន័យ​ធំធេង​ណាស់​​​សម្រាប់លោក​ដើម្បីការបន្តបំពេញបេសកកម្មរបស់សាលារៀន​ក្នុងការបណ្តុះបណ្តាល​ធន​ធាន​មនុស្សនៅប្រទេសកម្ពុជាដែលប្រកបដោយគុណភាព សីលធម៌ ភាពជាមេដឹកនាំ និងទំនួល​ខុសត្រូវ ស្របតាមនិន្នាការពិភពលោកនៃសតវត្សទី២១ ក្នុងយុគសម័យបដិវត្តន៍ឧស្សាហកម្ម៤.០។

ជាចុងបញ្ចប់ ដើម្បីឱ្យបេសកកម្មរបស់ពួកយើងទទួលបានជោគជ័យ គឺមិនអាចកាត់ផ្តាច់បាន​ឡើយពីការចូលរួមគ្រប់មជ្ឈដ្ឋាន ក្នុងនោះរួមមានអ្នកអាណាព្យាបាល សិស្សានុសិស្ស និងសហគមន៍​ទាំងមូល ក្នុងការគាំទ្រ ជំរុញ កែលម្អ និងលើកទឹកចិត្ត ក្នុងន័យលើកស្ទួយវិស័យអប់រំជាតិ​និយាយជារួម និង​សាលារៀន​​ អន្តរទ្វីប អាមេរិកាំងនិយាយដោយឡែក រួមគ្នាបណ្តុះ «ទំពាំង​ស្នង​ឬស្សី» របស់យើងឱ្យក្លាយជាបុគ្គលដ៏ប្រសើរនាថ្ងៃអនាគត។

សូមគោរពជូនពរលោកលោកស្រី អ្នកអាណាព្យាបាល និងសិស្សានុសិស្សទាំងអស់មាន​សុខភាព​​ល្អ និងសម្រេចជោគជ័យគ្រប់ភារកិច្ច។ សូមអរគុណ។

លោកស្រី ហ៊ិន ស្រីពៅ

ចាងហ្វាងរងមធ្យមសិក្សាបឋមភូមិ សាខាទួលគោក

សូមជម្រាបសួរ លោក លោកស្រី សាធារណជនទូទៅ និងប្អូនៗសិស្សានុសិស្សទាំងអស់ជាទីស្រឡាញ់រាប់អាន!

សូមស្វាគមន៍មកកាន់គេហទំព័រ និងការមកសិក្សានៅសាលារៀន អន្តរទ្វីប អាមេរិកាំងរបស់យើងខ្ញុំ!

សាលារៀន អន្តរទ្វីប អាមេរិកាំងគឺជាសាលាចំណេះទូទៅឯកជនដែលមានកម្មវិធីសិក្សាបែបស្ដង់ដា និងទទួលស្គាល់ដោយក្រសួង អប់រំ យុវជន និងកីឡា។ ក្រៅពីស្របតាមកម្មវិធីសិក្សារបស់រដ្ឋ សាលាក៏មានបញ្ចូលកម្មវិធីជំនាញជាច្រើនទៀតដូចជា ៖ សិល្បៈ ភ្លេង របាំ គេហកិច្ច គំនូ ក្បាច់គុនល្បុក្កតោ និងកីឡាជាច្រើនមុខទៀត។ មិនត្រឹមតែប៉ុណ្ណោះ សាលារៀនយើងក៏មានបន្ថែមនូវដំណើរទស្សនកិច្ចសិក្សា បំណិនជីវិត សកម្មភាពការងារសង្គម និងកម្មវិធីសប្បុរសធម៌ផងដែរ។ លើសពីនេះទៅទៀតសាលាគឺយកចិត្តទុកដាក់យ៉ាងខ្លាំងចំពោះការអប់រំ វិន័យ សីលធម៌ សុជីវធម៌ គុណធម៌ ដើម្បីឱ្យការសិក្សារបស់សិស្សទទួលបាន ចំណេះដឹង ចំណេះធ្វើប្រកបដោយគុណភាព និងបទពិសោធជីវិតល្អៗជាក់ស្ដែងក្នុងសង្គម  និងអភិវឌ្ឍខ្លួនឱ្យក្លាយជា កូនល្អ សិស្សល្អ មិត្តល្អ និងពលរដ្ឋល្អដែលសង្គមជាតិត្រូវការ។

ការសម្រេចចិត្តរបស់លោក លោកស្រីក្នុងការបញ្ជូនបុត្រធីតាឱ្យមកសិក្សានៅ សាលារៀន អន្តរទ្វីប អាមេរិកាំង កូនៗរបស់លោក​អ្នក និងទទួលបានចំណេះដឹង ជំនាញ​ពិត​ប្រាកដ​ដែល​ជា​យាន​សម្រាប់​ដឹកនាំ​ទៅ​កាន់​អនាគត​មួយ​ដ៏ត្រចះត្រចង់​នាពេល​ខាងមុខ។

ជាទីបញ្ចប់តាំងនាមឱ្យសាលារៀន អន្តរទ្វីប អាមេរិកាំង នាងខ្ញុំសូមថ្លែងអំណរគុណយ៉ាងជ្រាលជ្រៅចំពោះលោក លោកស្រី និង​សិស្សានុសិស្ស​ទាំងអស់​ដែល​តែងតែ​គាំទ្រ និង​ជឿជាក់លើ​សាលារៀន អន្ដរទ្វីប អាមេរិកាំងយើងខ្ញុំ។

សូមជូនពរលោក លោកស្រី និងប្អូនៗសិស្សានុសិស្សទាំងអស់ជួបប្រទះតែ សុខភាពល្អ សេចក្ដីសុខ និងទទួលបានជោគជ័យគ្រប់ភារកិច្ច។

សូមអរគុណ !

លោកស្រី ប៉ែន ពន្លឺ

ចាងហ្វាងរងក្រោមមត្តេយ្យ មត្តេយ្យ និងបឋមសិក្សា សាខាទួលគោក

លោកស្រី​ ប៉ែន​ ពន្លឺ​ កើត​នៅ​ថ្ងៃទី​ ១០​ ខែវិច្ឆិកា​ ឆ្នាំ១៩៨២​ នៅ​ខេត្តបាត់ដំបង​។ លោកស្រី​ទទួល​បាន​សញ្ញាបត្រ​មធ្យមសិក្សា​ គរុកោសល្យ​ ផ្នែក​បឋមសិក្សា​ នៅក្នុង​ឆ្នាំ២០០២​។ នៅ​ថ្ងៃទី០១​ ខែតុលា​ ឆ្នាំ២០០២​ លោកស្រី​បាន​ចេញទៅ​បម្រើការ​ងារ​ ជា​គ្រូបង្រៀន​ផ្នែក​បឋមសិក្សា​ នៅ​សាលាបឋមសិក្សា​បឹង​អា​ជាង​ ក្នុង​ខេត្តបាត់ដំបង​បាន​រយៈពេល​ជិត២ឆ្នាំ​។ ក្រោយមក​ ដោយសារ​សាលារៀន​ដែល​លោកស្រី​ទៅ​បម្រើការ​នោះ​នៅ​ឆ្ងាយ​ពី​ផ្ទះ​ លោកស្រី​ក៏​សម្រេចចិត្ត​ព្យួរការងារ​ ហើយក៏​បាន​ផ្លាស់​ មក​ធ្វើការ​ជា​គ្រូបង្រៀន​មត្តេយ្យ​ភាសាអង់គ្លេស​ពាក់កណ្តាល​ពេញ​ម៉ោង​នៅក្នុង​ក្រុង​បាត់ដំបង​វិញ​។

ជាមួយគ្នា​នេះ​ដែរ​ ក្នុង​កំឡុង​ពេល​បំពេញការងារ​ជា​គ្រូ​មត្តេយ្យ​ភាសាអង់គ្លេស​ លោកស្រី​ក៏បាន​ចូល​សិក្សា​ថ្នាក់​បរិញ្ញាបត្រ​នៅ​វិទ្យាស្ថាន​គ្រប់គ្រង​ និង​សេដ្ឋកិច្ច​(IME​) បាន​រយៈពេល​ជិត​ពីរ​ឆ្នាំ​។ នៅ​ថ្ងៃទី១៨​ ខែមីនា​ ឆ្នាំ២០០៥​ លោកស្រី​ក៏បាន​រៀប​អាពាហ៍​ពិពាហ៍​ ជាមួយ​លោក​ សិទ្ធ​ សុខសាន្ត​ ដែល​ធ្វើការ​ជា​បុគ្គលិក​នៅ​ស្ថានីយ​ទូរទស្សន៍​ប៉ុស្តិ៍​លេខ៥​ ក្នុង​រាជធានី​ភ្នំពេញ​ ដែល​តម្រូវ​ ឱ្យ​លោកស្រី​ត្រូវ​ប្តូរ​ទីលំនៅ​ ហើយ​ត្រូវ​ផ្ទេរ​ការងារ​ពី​ខេត្តបាត់ដំបង​មក​បម្រើការ​ងារ​នៅ​សាលាបឋមសិក្សា​សាមគ្គី​ ក្នុង​រាជ​ ធានី​ភ្នំពេញ​វិញ​ ក្នុង​ឆ្នាំ២០០៥​។

ក្រោយមក​ ដោយសារ​លោកស្រី​បាន​ទទួលជោគជ័យ​ក្នុង​ការ​សម្ភាស​ចូល​ធ្វើការ​នៅ​ សាលារៀន​ អន្តរទ្វីប​ អាមេរិកាំង​ លោកស្រី​ក៏បាន​សម្រេចចិត្ត​ចូល​ធ្វើការ​ចាប់ពី​ពេលនោះ​មក​។ ក្នុង​កំឡុង​ពេលធ្វើការ​ នៅ​សាលារៀន​ អន្តរទ្វីប​ អាមេរិកាំង​ អ្នកស្រី​បាន​ឆ្លៀត​បន្ត​ការសិក្សា​ថ្នាក់​បរិញ្ញាបត្រ​នៅ​ សកលវិទ្យាល័យ​ភ្នំពេញ​ អន្តរជាតិ​ (PPIU​) ចាប់ពី​ឆ្នាំ២០១២​ រហូតដល់​ឆ្នាំ២០១៦​ រយៈពេល​បួន​ឆ្នាំ​ ដោយ​រៀន​វេន​យប់​។ មិនយូរ​ប៉ុន្មាន​ នៅ​ថ្ងៃ​ ទី២២ខែកុម្ភៈ​ ឆ្នាំ២០១៦​ លោកស្រី​បាន​ទទួល​សញ្ញាបត្រ​កម្រិត​បរិញ្ញាបត្រ​ផ្នែក​អក្សរ​សាស្រ្ត​អង់គ្លេស​ (គ្រប់គ្រង​ជំនួញ​) ដោយ​ជោគជ័យ​។ លោកស្រី​ ប៉ែន​ ពន្លឺ​ បាន​ចូល​បម្រើការ​ងារ​នៅ​ សាលារៀន​ អន្តរទ្វីប​ អាមេរិកាំង​ នៅ​ថ្ងៃទី១០​ ខែតុលា​ ឆ្នាំ២០០៥​ ក្នុង​តួនាទី​ជា​គ្រូបង្រៀន​ផ្នែក​បឋមសិក្សា​ (ពេញ​ម៉ោង​)។

​ដោយ​យោង​ទៅលើ​សមត្ថភាព​ ការ​ខិតខំ​ប្រឹងប្រែង​ និង​ភាព​តស៊ូ​អត់ធ្មត់​ក្នុង​ការ​បំពេញការងារ​ លោកស្រី​ក៏​ទទួល​បានការ​តំឡើង​តួនាទី​ជា​ចាងហ្វាង​រង​ ក្រោម​មត្តេយ្យ​ មត្តេយ្យ​ និង​បឋមសិក្សា​ នៃ​សាលារៀន​ អន្តរទ្វីប​ អាមេរិកាំង​ សាខា​ទួលគោក​នៅ​ថ្ងៃទី០១​ ខែឧសភា​ ឆ្នាំ២០១៩​។ ​លោកស្រី​ប៉ែន​ ពន្លឺ​ បាន​បំពេញការងារ​យ៉ាង​ល្អ​ប្រសើរ​ជូន​ស្ថាប័ន​អស់​រយៈពេល​ជិត១៤ឆ្នាំ​កន្លងមក​នេះ​។ លោកស្រី​គឺជា​គ្រូ​​មួយ​រូប​ដែល​មានការ​ប្តេជ្ញា​ចិត្ត​ខ្ពស់​ពោរពេញ​ដោយ​គំនិត​ច្នៃប្រឌិត​ ប្រកបដោយ​ក្រមសីលធម៌​វិជ្ជាជីវៈ​ខ្ពស់​ក្នុង​ការ​បំពេញការងារ​។ សាលា​មានការ​កោតសរសើរ​យ៉ាង​ស្មោះចំពោះ​លោកស្រី​ដែល​​មានការ​លះបង់​ខ្ពស់​ និង​ខិតខំ​អស់ពី​កម្លាំងកាយ​ចិត្ត​បំពេញការងារ​ ដែល​បាន​រួមចំណែក​ក្នុង​ការ​អភិវឌ្ឍ​ស្ថាប័ន​ឱ្យ​ទទួល​បាន​ជោគជ័យ​រហូតមកដល់​បច្ចុប្បន្ន​នេះ​។

លោកស្រី ភី ភារីន

នាយិកាកីឡា សាខាទួលគោក

លោកស្រី ភី ភារីន កើតនៅថ្ងៃទី០៤ ខែវិច្ឆិកា ឆ្នាំ១៩៨១ នៅ​ភូមិ​កំពង់​ចម្លង ឃុំ​ព្រែក​ទន្លាប់ សុ្រក​លើក​ដែក ខេត្ត​កណ្តាល។ លោកស្រី បាន​ទទួល​សញ្ញា​បត្រ​គ្រូមធ្យម​សិក្សា​បឋមភូមិ ឯក​ទេស​អប់រំកាយ និងកីឡា នៅឆ្នាំ២០០១ និង​សញ្ញា​បត្រ​កម្រិត​បរិញ្ញ​បត្រ ផ្នែក​អក្សរ​សាស្ត្រ​ភាសា​អង់គ្លេស ពី​សកល​វិទ្យាល័យ អន្តរជាតិ ភ្នំពេញ នៅ​ឆ្នាំ​២០០៨។

លោកស្រី​បាន​ចូល​បម្រើ​ការ​ក្នុង​ស្ថាប័ន​រដ្ឋ​មួយ នៅ​វិទ្យាល័យ​ឥន្រ្ទ​ទេវី រាជ​ធានី​ភ្នំពេញ នៅ​ថ្ងៃទី០១ ខែតុលា ឆ្នាំ២០០១ រហូត​ដល់​បច្ចុប្បន្ន។ ទន្ទឹមគ្នា​ផង​ដែរ លោកស្រី​បាន​ចូល​បម្រើ​ការងារ​នៅ​វិទ្យាស្ថាន និង​សាលា​រៀន អន្តរទ្វីប អាមេរិកាំង នៅ​ថ្ងៃទី៣០ ខែសីហា ឆ្នាំ២០០៦ ក្នុង​តួនាទី​ជា​គ្រូ​បង្រៀន​ភាសា​អង់គ្លេស និង​គ្រូ​កីឡា អប់រំកាយ ក្រៅម៉ោង។ ផ្អែក​លើ​សមត្ថភាព និង​ការ​ខិតខំ​ប្រឹង​ប្រែង​ធ្វើ​ការងារ​របស់​លោកស្រី លោកស្រី​ត្រូវ​បាន​ដំឡើង​តួនាទី​ជា​អនុ​ប្រធាន​ផ្នែក​កីឡា។ បន្ទាប់​មក​ទៀត លោកស្រី​ត្រូវ​បាន​ដំឡើង​តួនាទី​ជា​ប្រធាន​ផ្នែក​កីឡា ដោយ​សារ​ភាព​សម្រប​សម្រួល​ការងារ​របស់​លោកស្រី​ក្នុង​ការ​ដឹកនាំ និង​ខិតខំ​ប្រឹង​ប្រែង​បំពេញ​ភារ​កិច្ច​ការងារ និង​ភាព​តស៊ូ​លះ​បង់​ខ្ពស់ ដែល​បាន​រួម​ចំណែក​ក្នុង​ការ​អភិវឌ្ឍ​ផ្នែក​កីឡា ​នៃវិទ្យាស្ថាន និង​សាលា​រៀន អន្តរទ្វីប អាមេរិកាំង។ សព្វថ្ងៃ លោកស្រី​ជា​នាយិកា​កីឡា នៃវិទ្យាស្ថាន និង​សាលា​រៀន អន្តរទ្វីប អាមេរិកាំង សាខាទួលគោក។

ក្នុងនាម​លោកស្រី​តំណាង​បុគ្គលិក​សិក្សា នៃវិទ្យាស្ថាន និងសាលារៀន អន្តរទ្វីប អាមេរិកាំង សូម​ថ្លែង​អំណរ​គុណ​យ៉ាង​ជ្រាល​ជ្រៅ​ចំពោះ លោក លោកស្រី មាតា​បិតា ឬ​អ្នក​អាណា​ព្យាបាល​ដែល​តែង​តែ​គាំទ្រ និង​មាន​ទំនុក​ចិត្ត​ចំពោះ​វិទ្យាស្ថាន និង​សាលា​រៀន អន្តរទ្វីប អាមេរិកាំង ដែល​ជា​សាលា​រៀន​ផ្តល់​នូវ​សេវា​អប់រំ និង​ចំណេះ​ដឹង​ពិត​ប្រាកដ​ជូន​ដល់​កុលបុត្រ​កុលធីតា​ខ្មែរ ដែល​ជា​ទំពាំង​ស្នង​ឫស្សី និង​ជា​សសរ​ទ្រូង​ដ៏​រឹងមាំ​របស់​ប្រទេស​ជាតិ។

លោក ឃៀង វាសនា

ប្រធានគ្រូកុំព្យូទ័រ​ សាខាទួលគោក

លោក ឃៀង វាសនា បានបញ្ចប់ការសិក្សាថ្នាក់បរិញ្ញាបត្រ ផ្នែកគ្រប់គ្រងប្រព័ន្ធព័ត៌មានវិទ្យា ពីសកលវិទ្យាល័យជាតិគ្រប់គ្រង ក្នុងឆ្នាំ២០០៥ ហើយក៏បានបញ្ចប់ ថ្នាក់អនុបណ្ឌិតសិក្សាអភិវឌ្ឍន៍ នៅសាកលវិទ្យាល័យភូមិន្នភ្នំពេញ ក្នុងឆ្នាំ២០១៥ ផងដែរ។

លោកបានចូលបម្រើការនៅក្នុងក្រុមហ៊ុន ម៉េងលី ជេ. គួច អេឌ្យូខេសិន នៅថ្ងៃទី១៩ ខែកញ្ញា ឆ្នាំ២០១៥ ក្នុងនាមជាប្រធានគ្រូកុំព្យូទ័រនៅសាសារៀន អន្តរទ្វីប អាមេរិកាំង ដែលគ្រប់គ្រងទៅលើកម្មវិធីសិក្សាកុំព្យូទ័រតាំងពីបឋមសិក្សា ដល់មធ្យមសិក្សា ក្នុងកម្មវិធីចំណេះដឹងទូទៅភាសាខ្មែរ។ មុនពេលលោកចូលបម្រើការនៅក្នុងក្រុមហ៊ុន ម៉េងលី ជេ. គួច អេឌ្យូខេសិន លោកធ្លាប់ជាអ្នកបម្រើការងារនៅអង្គការ។

គោលបំណងរបស់កម្មវិធីសិក្សាកុំព្យូទ័រនេះ គឺដើម្បីឱ្យសិស្សានុសិស្សអាចទទួលបាននូវចំណេះដឹងផ្នែកបច្ចេកវិទ្យាទំនើប ជាពិសេសបច្ចេកវិទ្យាព័ត៌មានវិទ្យា ដែលត្រូវបានប្រើប្រាស់ពាសពេញសកលលោក ក្នុងវិស័យផ្សេងៗដែលតម្រូវអោយមនុស្សម្នាក់ៗត្រូវមានជំនាញ និងចំណេះដឹងផ្នែកកុំព្យូទ័រ ដោយខានពុំបាន ក្នុងការបំពេញការងារប្រចាំថ្ងៃ។ ដោយមើលឃើញពីតម្រូវការដ៏ចាំបាច់នេះ សាលារៀន អន្តរទ្វីប អាមេរិកាំង បានបង្កើតកម្មវិធីបណ្តុះបណ្តាលផ្នែកកុំព្យូទ័រឡើង ដើម្បី ផ្តល់ជូនសិស្សានុសិស្ស នូវចំណេះដឹង និងជំនាញកុំព្យូទ័រពិតប្រាកដ ព្រមទាំងមានសមត្ថភាពគ្រប់គ្រាន់ក្នុងការបំពេញការងាររបស់ខ្លួនប្រកបដោយជោគជ័យទៅអនាគត។

លោក ផេង ឧត្តម

ប្រធានគ្រូ នៃកម្មវិធីភាសាអង់គ្លេស​ សាខាទួលគោក

លោក​ ផេង​ ឧត្តម​ កើត​នៅ​ឆ្នាំ​ ១៩៩១​ នៅ​ខេត្តតាកែវ​ ។ គាត់​បាន​បញ្ចប់​ថ្នាក់​បរិញ្ញាបត្រ​ផ្នែក​បង្រៀ​បភា​សា​អង់គ្លេស​ពីសា​កល​វិទ្យាល័យ​បញ្ញា​សាស្ត្រ​កម្ពុជា​នៅ​ឆ្នាំ​ ២០១៦​។ ពីឆ្នាំ​ ២០១២​ មកដល់​បច្ចុប្បន្ន​ ឧត្តម​បាន​បង្រៀន​ថ្នាក់​ភាសាអង់គ្លេស​នៅ​តាម​សាលា​ឯកជន​មួយចំនួន​ និង​ទទួល​បាន​បទ​ពិសោធ​ន៍​ល្អ​ៗជាច្រើន​។

ក្រោយមក​ទៀត​ លោក​បាន​ដាក់ពាក្យសុំ​បំពេញការងារ​នៅ​ សាលារៀន​ អន្តរទ្វីប​អាមេរិកាំង​ចាប់តាំងពី​ឆ្នាំ២០១៦រហូតមកដល់​បច្ចុប្បន្ន​។​ លោក​ ផេង​ ឧត្តម​ បាន​និង​កំពុង​បំរើ​រកា​រជូន​ សាលារៀន​ អន្តរទ្វីប​អាមេរិកាំង​ ក្នុង​តួនាទី​ជា​គ្រូ​ក្រៅ​ម៉ោង​ពេល​ដំបូង​ ហើយក៏​បាន​ប្តូរ​តួនាទី​ជា​គ្រូ​ពេញ​ម៉ោង​រហូត​មក​។ ដោយ​មាន​សម្ថ​ភាព​បង្រៀន​ ការ​ចេះ​ជួយ​ក្រុមការងារ​ដោយ​ទឹកចិត្ត​ល្អ​ និង​ បូក​ផ្សំ​និង​ការ​សហការ​ការងារ​ល្អ​ នៅ​ថ្ងៃទី២​ ខែធ្នូ​ ឆ្នាំ២០១៩​ ឧត្តម​ ត្រូវ​បាន​ដំឡើង​តួនាទី​ទៅជា​អនុប្រធាន​គ្រូ​ភាសាអង់គ្លេស​ដែល​សម្របសម្រួល​កម្មវិធី​សិក្សា​ពី​ថ្នាក់ក្រោម​មត្តេយ្យ​ដល់​ថ្នាក់​ទី១២​ អម​ជាមួយ​កម្មវិធី​ចំណេះ​ទូទៅ​ភាសាខ្មែរ​ស្របតាម​ស្តង់ដារ​អាមេរិកាំង​នៅ​សាខា​ទួលគោក​។

​ ក្រោយមកទៀតដោយមានតម្រូវការរបស់សាលា និងបូកផ្សំនិងការសហការល្អ ឧត្តមត្រូវបានដំឡើងទៅជាប្រធានគ្រូភាសាអង់គ្លេសនៅថ្ងៃទី០១ ខែតុលា ឆ្នាំ២០២១។ ក្នុងនាម​ជា​ប្រធាន​គ្រូ​ម្នាក់​ ឧត្តម​ មាន​ទំនួល​ខុសត្រូវ​ខ្ពស់​ក្នុង​ការ​បំពេញ​តួនាទី​ និង​រីករាយ​ក្នុង​ការ​ជួយ​ក្រុមការងារ​ និង​ សិស្សានុសិស្ស​នៃ​សាលារៀន​ អន្តរទ្វីប​អាមេរិកាំង​នេះ​ ឱ្យ​មាន​ភាព​រីក​ចំរើន​​ និង​មានគុណ​ភាព​ខ្ពស់​។​

សូម​អរគុណ​ !

លោកស្រី ផែង ស្រីណាង

ប្រធាន ផ្នែករដ្ឋបាលសាលារៀន អន្តរទ្វីប អាមេរិកាំង​ សាខាទួលគោក

ជម្រាបសួរមាតាបិតា ឬអ្នកអាណាព្យាបាលជាទីគោរព!
សួស្តីប្អូនៗសិស្សានុសិស្សជាទីរាប់អាន!

នាងខ្ញុំឈ្មោះ ផែង ស្រីណាង មានតួនាទីជា ប្រធានផ្នែករដ្ឋបាល សាលារៀន អន្តរទ្វីប អាមេរិកាំង។ ផ្នែករដ្ឋបាល សាលារៀន អន្តរទ្វីប អាមេរិកាំង សាជាផ្នែកមួយចូលរួមចំណែកក្នុងការបំពេញសេវាកម្មទូទៅសម្រាប់តម្រូវការរៀន និងបង្រៀនរបស់លោកគ្រូ-អ្នកគ្រូ និងសិស្សានុសិស្ស។ លើសពីនេះ ផ្នែកលេខាធិការត្រូវរៀបចំរាល់ឯកសារសិស្ស និងឯកសារផ្សេងៗ ទៀតរបស់សាលារៀនជាមួយការិយាល័យអប់រំខណ្ឌ និងមន្ទីរអប់រំ យុវជន និងកីឡារាជធានីភំ្នពេញ។

តួយ៉ាងសាលារៀន អន្តរទ្វីប អាមេរិកាំង ជាសាលាមួយដែលទទួលស្គាល់ជាផ្លូវការដោយក្រសួងអប់រំ យុវជន និងកីឡា តាមប្រកាសលេខ1910អយក.ប្រក. ចុះថ្ងៃទី27 ខែវិចិ្ឆកា ឆ្នាំ2006 និងលេខ458អយក.ប្រក. ចុះថ្ងៃទី27 ខែមីនា ឆ្នាំ2007។ អស់រយៈពេល10ឆ្នាំ ដែលនាងខ្ញុំបានបម្រើការងារនៅក្នុងសាលា នាងខ្ញុំសង្កេតឃើញថា សាលារៀនមានកម្មវិធីសិក្សាច្បាស់លាស់ និងសម្បូរបែប តាំងពីថ្នាក់ក្រោមមត្តេយ្យសិក្សា ដល់ថ្នាក់វិទ្យាល័យ តាមបែបខ្មែរ-អាមេរិកាំង។ ឆ្លងកាត់រយៈពេល12ឆ្នាំ សាលារៀន អន្តរទ្វីប អាមេរិកាំង បានចាក់គ្រឹះយ៉ាងរឹងមាំទាក់ទងនឹងវិស័យអប់រំ នៅក្នុងរាជធានីភំ្នពេញ និងជាសាលាទី1 ដែលលេចធ្លោជាងគេ អំពីគុណភាព វិន័យ និងសេវាកម្ម។ គណៈកម្មាការសាលា ព្យាយាមជ្រើសរើសលោកគ្រូ-អ្នកគ្រូ ដែលមានគរុកោសល្យ និងបទពិសោធន៍ល្អ បន្ទប់សិក្សាបំពាក់ដោយសម្ភារទំនើប បណ្ណាល័យធំទូលាយ កម្មវិធីប្រកួតប្រជែងសមត្ថភាព កម្មវិធីសប្បុរធម៌ និងកម្មវិធីជាច្រើនទៀត ដើម្បីឱ្យសិស្សានុសិស្សទាំងអស់ទទួលបាននូវចំណេះដឹង និងចំណេះធ្វើពិតប្រាកដ។

ក្នុងនាមនាងខ្ញុំជាបុគ្គលិកដែលបម្រើការនៅសាលារៀន អន្តរទ្វីប អាមេរិកាំង សូមអរគុណយ៉ាងជ្រាវជ្រៅដល់មាតាបិតា ឬអ្នកអាណាព្យាបាលសិស្សទាំងអស់ដែលបានគាំទ្រសាលារៀន និងសូមជូនពរឱ្យជួបប្រទះតែសេចក្តីសុខគ្រប់ក្រុមគ្រួសារ និងប្រាថ្នាអ្វីបានដូចបំណង។

លោក ឃី គីមស្រៀ

អនុប្រធានគ្រូ នៃកម្មវិធីភាសាអង់គ្លេស​ សាខាទួលគោក

នៅក្នុងឆ្នាំ២០១៨ លោក ឃី គីមស្រៀ បានបញ្ចប់ការសិក្សាថ្នាក់បរិញ្ញាបត្រផ្នែកអប់រំ​​(TEFL) ពីវិទ្យាស្ថានភាសាបរទេសនៃសាកលវិទ្យាល័យភូមិន្ទភ្នំពេញ។ បន្ទាប់ពីបានបញ្ចប់ការសិក្សាថ្នាក់បរិញ្ញាបត្រ លោកក៏បានបន្តការសិក្សាថ្នាក់អនុបណ្ឌិតផ្នែកគរុកោសល្យ​ (TESOL) នៅវិទ្យាស្ថានភាសាបរទេស ក្នុងឆ្នាំ ២០១៩ និងបានបញ្ចប់ការសិក្សានៅឆ្នាំ ២០២១។

ទាក់ទងនឹងបទពិសោធន៍ការងារ​ លោក ឃី គីមស្រៀ បានបង្រៀនភាសាអង់គ្លេសគ្រប់កម្រិតអស់រយៈពេល៧ឆ្នាំរួមទាំងកម្រិតឧត្តមសិក្សាផងដែរ។ គាត់ក៏បានធ្វើការនៅសាកលវិទ្យាល័យធនធានមនុស្ស (HRU) ក្នុងមុខតំណែងជាគ្រូបង្រៀនវគ្គបណ្តុះបណ្តាលនៅឆ្នាំ ២០១៦ ផងដែរ។

នៅថ្ងៃទី ១៧ ខែធ្នូឆ្នាំ ២០១៨ លោក ឃី គីមស្រៀ​ បាន​ចាប់ផ្តើមចូល​បម្រើការ​ងារ​នៅ​សាលារៀនអន្តរទ្វីបអាមេរិកាំងក្នុងនាមជាគ្រូបង្រៀនភាសាអង់គ្លេសថ្នាក់ពេញម៉ោង។ ដោយសារ​សមត្ថភាព​ និង​ឆន្ទៈ​ខ្ពស់​ក្នុង​ការ​បំពេញការងារ​ លោក​ត្រូវ​បាន​តំឡើង​តួនាទី​ទៅជា​អនុប្រធាន​គ្រូ​​ភាសាអង់គ្លេស​នៅ​ថ្ងៃទី០១​ ខែតុលា​ ឆ្នាំ២០២១​ ដើម្បីទទួលភារកិច្ចការក្នុងការជួយសម្របសម្រួល​​ដល់​កម្មវិធី​សិក្សា​ភាសាអង់គ្លេស​ចាប់ពី​កម្រិត​មត្តេយ្យ​ បឋម​ និង​មធ្យមសិក្សា​ក្នុង​កម្មវិធី​ចំណេះដឹង​ទូទៅ​ភាសាខ្មែរ​នៅ​សាលារៀន​ អន្តរទ្វីប​ អាមេរិកាំង​។

សូម​អរគុណ​ !