សិស្សថ្នាក់ក្រោមមត្តេយ្យ និងមត្តេយ្យសិក្សា ចុះកម្មសិក្សា ឆ្ពោះទៅកាន់កន្លែងកម្សាន្តសម្រាប់កុមារ នៃមជ្ឈមណ្ឌល ឃីត ស៊ីធី

កាលពីថ្ងៃទី១៧ ខែឧសភា ឆ្នាំ២០១៨ កន្លងទៅនេះ គណៈគ្រប់គ្រងសាលា និងលោកគ្រូ អ្នកគ្រូនៃសាលារៀន អន្តរទ្វីប អាមេរិកាំង សាខាទួលគោក បានដឹកនាំសិស្សថ្នាក់ក្រោមមត្តេយ្យ និងមត្តេយ្យសិក្សា ទាំងវេនព្រឹក និងរសៀល ធ្វើដំណើរទៅចុះកម្មសិក្សាលើកទី៣៩នៅកន្លែងកម្សាន្ត
សម្រាប់កុមារ នៃមជ្ឈមណ្ឌល ឃីត ស៊ីធី ដែលស្ថិតនៅអគារលេខ១៦២A មហាវិថីព្រះសីហនុ រាជធានីភ្នំពេញ។ កម្មវិធីចុះកម្មសិក្សានេះ គឺជាឱកាសមួយសម្រាប់ប្អូនៗសិក្សាសង្កេតអំពីមហាជន និងបរិស្ថាន​ជុំវិញ ហើយ​នេះ​ក៏ជា​ឱកាសដែលសិស្សានុសិស្សទទួលបាននូវចំណេះដឹងជាច្រើនបន្ថែមលើមេរៀនក្នុង​ថ្នាក់​ដូចជា យល់ដឹងពីឧបករណ៍សិក្សាតាមបែបវិទ្យាសាស្រ្តដ៏ទំនើប ឃើញរូបភាព និងស្ថានភាពពិតៗ ដែលពួកគេធ្លាប់បានសិក្សាក្នុងថ្នាក់រួមទាំងរៀននូវវាក្យសព្ទថ្មីៗបន្ថែមទៀត។ ជាមួយគ្នានោះផងដែរ ប្អូនៗក៏អាចស្គាល់បាននូវស្លាកសញ្ញាចរាចរណ៍មួយចំនួន និងកំណត់សម្គាល់ផ្សេងៗ ដែលប្រើប្រាស់លើដងវិថី​ក្នុងកំឡុងពេលធ្វើដំណើរ ស្គាល់ឈ្មោះទីតាំងភូមិសាស្ដ្រ និងមហាវិថីមួយចំនួនក្នុងរាជធានីភ្នំពេញ។ ចាពិសេសជាងនេះទៅទៀត ប្អូនៗនឹងបានរឹតចំណងមិត្ដភាព សាមគ្គីភាព បង្កើនភាពក្លាហាន និងបទពិសោធន៍ក្នុងការសហការ ការដឹកនាំ សាមគ្គីភាព ឯករាជ្យភាព ភាពម្ចាស់​ការ ទំនាក់ទំនងក្នុងក្រុម និងទំនាក់ទំនងជាមួយមហាជន​បាន​កាន់​តែប្រសើ និងទទួលបាននូវចំណេះដឹងថ្មីៗ និងអារម្មណ៍ជ្រះថ្លាក្នុងពេលកំពុងចុះកម្មសិក្សានៅទីនោះ ក៏ដូច​ជា​ពេល​ត្រឡប់ មក​គេហដ្ឋានវិញផងដែរ។